دروس خصوصية في الرومانسية 2
دروس خصوصية في الرومانسية
مع استاذ الرومانسية السودانية
#زول_بشخبط نزار عثمان هاشم
الرومانسية الفعلية
اتكلمنا عن الحصه الفاتت عن الرومانسية اللفظية او التعبيرية وفي الحصة دي ان شاءالله ح نتكلم عن الرومانسية الفعلية وهى انك تفعل شى بطريقة جميلة واكثر من رائعة تبهر وتدهش بيهو زوجتك او زوجك .
الزول ممكن يعمل لكن العمل العادي والعمل الرومانسي فرق... مثلا لو جبت هدية لي زوجتك(وكونك تجيب هدية لي زوجتك دي حاجةماساهلة) وقلت ليها هاك دي هي هدية مني ليك واديتة ليها في يدها .والهدية تكون عبارة عن سلسل ماضروري حق دهب ان شاءالله حق حديد. لمن تشوف الهدية حديد ح تزعل تقول ليك هسي جايب لي هدية سلسل حق حديد دي هديتك مع الرجال (وبدل ما انت كنت ناوي تفرحة تلقى نفسك زعلتها) لكن تعال شوف لو جبت نفس سلسل الحديد دا وفي علبة جميلة ومغلفة وناديتة وقلت ليها تعالي يا السميحة اقعدي بجمبي بجاي. ولمن تقعد تقوليها غمدي عيونك وتربط السلسل في رقبتة .وتقول ليها فتحي. وقبل تشوف السلسل اديها علبتو .ولمن تشوفوا تقول ليها والله تستاهلي الماس مش دهب بس إلا انتي براك عارفة الظروف وانا عارفك عارفاها ومقدراها. لكن انا ما ناسيك وقلت وكت ما بقدر اجيب الدهب والماس قلت اجيب قدر قدرتي .
فرق ولا مافرق
والافعال الرومانسية كتيرة. وطبعا يا اخوانا الرومانسية متوقفة على الراجل اكتر شئ لو مابقى رومانسي مشكلة حتى لو بقت الزوجة رومانسية ( في زوجة رومانسية حبت تفاجي زوجها اها يازول جاء خاشي الغرفة لقي ليك الشموع مولعة نادها يامرة تعالي شيلي الشي دا. كتمتي نفسي وبعدين دا شنو دا دايرة تحرقينا انت عويرا. اها شفتو ) عشان كدا الراجل لمن يكون رومانسي بكون هو المبادر.
وطبعا الرومانسية صفة وطبع بكون في الزول (لانها هي الرقة في المشاعر والاحساس ) لكن ممكن تكتسب وتتعلم.
الافعال الرومانسية كتيرة وطبعا كل زول بيعرف زولوا اكتر حاجة بحبها شنو من خلال العشرة ولو مابتعرفوا ممكن تسألوا لكن شينة منك المفروض من غير ما تسأل تكون براك عارف .وممكن قبل تتزوج تمشي لي نسيبتك تقول ليها والله يا خالتي انت اكتر شخص بيعرف بنتك. ياكي الوالداها وربيتيها فعايز اعرف منك شنو الاشياء البتحبها وبتكرها ح توريك.وانت ماتقصر اعمل الحاجات البتحبها وفاجيها بيها.
فاجيها بانك تجيب الشئ السمعتها قالت يوم نفسي فيهو زي توب او خاتم او حلق دهب او شئ فاجيها بيهو وجيبو ليها وقول ليها انا ملاكك الخاص الموجود لتحقيق امنياتك انت وبس يازوجتي الغالية.
لمن تكونو طالعين لي مناسبة العادة حقت السودانيين النسوان يمشن براهن والرجال يمشو براهم اكسر القاعدة دي هي لا سنة ولا فرض .اطبق مرتك وامشو سوا ولمن تكونوا ف الطريق ماشين ماتمشي قدامها بسبعة امتار وكل مرة تتلفت تعاين ليها. امشي معاها الحجل بالرجل ولو في طريقة اشبك ايديك بيها وابقوا متقاودين وشابكين ايديكم .
في كل شهر حدد طلعتين طلعة عزومة عشاء وطلعة للحديقة ومناطق التنزه وحافظ عليهن ولازم تطلعوهن في كل شهر .ولو حصل في شهر ماطلعتوا عشان ظروف حصلت الشهر الجاي تطلعو 4مرات طلعتين حقت الشهر ذاتو وطلعتين حقت الشهر الماقدرتو تطلعوا فيهو.
وتذكر عزيزي الرجل ان اسعادك لزوجتك نوع من الرجولة ، ماتقول لي دا كلام ناس نيين وحتى لو دا كلام ني طالما بيسعد زوجتك عليك بفعله.
وكتيرين بقولوا السودانيين مارومانسيين القال ليكم منوا ؟وماضروري عشان يثبتو ليكم انهم رومانسيين يكون قدامكم انتو لانهم هم ماممثليين في مسلسل عشان تشوفوا انتو.
ولنا في حبيبنا وشفيعنا ورسولنا محمد ﷺ قدوة
فكان النبي صلى الله عليه وآله وسلم يسابق السيدة عائشة ويتركها تسبقه، ثم يسابقها مرة أخرى فيسبقها ويقول لها ضاحكًا:"هذه بتلك".
وايضا عن أنس قال: "خرجنا إلى المدينة -قادمين من خيبر- فرأيت النبي صلى الله عليه وآله وسلم يجلس عند بعيره، فيضع ركبته وتضع صفية رجلها على ركبتيه حتى تركب البعير"، فلم يخجل الحبيب صلى الله عليه وآله وسلم من أن يرى جنوده هذا المشهد وهو يظهر الحب والمودة لزوجته السيدة صفيه.
دا خير الخلق كلهمُ ﷺ كان رومانسي انت اشنك يا اب جلحات متعنطز فوق كم...
وبكدا تكون انتهت الحصة التانية
#زول_بشخبط
نزار عثمان هاشم
تعليقات
إرسال تعليق